Hvar er skottið?

Oj bara.
Einhver sóðaleg kínversk klámsíða vogaði sér að auglýsa sína dónastarfsemi með því að kommenta á bloggið mitt. Þessari leiðindaathugasemd hefur hér með verið eytt að eilífu, en hvað veit ég um það hversu margar sálir eru í molum eftir að hafa rekið auguní þennan sora? Svei attan. Ég biðst heilshugar forláts á að hafa ekki gripið fyrr í taumana, en ég mátti bara ekkert vera að því að þvælast á netinu um helgina, þar sem ég þurfti að vinna og læra mér til óbóta.

Já, og í vinnunni fékk ég að heyra það að ég væri illa að mér og barasta með lágt greindarstig. Það tilkynnti mér settlegur frakkaklæddur herramaður, sem varð talsvert bitur þegar ég þekkti ekki titilinn á einhverri bók á dönsku um umhverfistengda þróun á Norðurlöndum sem einhver samnorræn nefnd gaf út í fyrra. Nú spyr ég; veit nokkur hversu mörg þúsund titlar eru til sölu í bókaverslunum Pennans-Eymundsson-Máls og menningar? Hins vegar hrósuðu indælis hjón mér fyrir að pakka svo fallega inn í gjafapappír. Þar sem ég þyki greinilega óttalegur heimskuhaus, þá ætti ég líklega að nýta mér þessa vel metnu hæfileika mína og gera innpökkun að ævistarfi mínu. Það væri þá við hæfi.

Mér flýgur í hug hvort þessi kínverska internetmella hafi kannski fengið grillur í kollinn við að lesa ljótuorðabloggið mitt. Þá ber ég við stundarbrjálæði, og lýsi því yfir að ég legg ekki í vana minn að klæmast á opinberum vettvangi. Og til að staðfesta það koma hér nokkur falleg orð:

frostrósir, jól, súkkulaði, ástarsorg, móðurlíf, fortíðarþrá, kaffi, víðikettlingar, elskendur, nótt, ljúfsár, hrafn, agnarögn, ljóð, dreymandi, óminni, skáld, ljósmóðir, ljúflingur, unna, mistur, vinur, alsæla, daggardropi, sálarangist, norðurljós, þoka, verfákur, tár, víf

Nú mun ég brjóta saman þvott.