Hvar er skottið?

Snúin aftur.
Föstudagurinn var sumsé æstur hjá mér og ekki tími fyrir opinbert þvaður. Það var mikið lærarlæra en alls ekki nóg, og svo brá ég mér niður í Bókval að heilsa upp á öðlingana. Að sjálfsögðu keypti ég mér bækur á útsölunni. Þær heita 'Everything - Yoga' og 'Galloway's Book on Running' og var þessi unaður á 75% afslætti sem réttlætir nú flest nema föðurmorð. Svo brá ég mér í kvöldverð til Unnar sem var engu minni unaður, og bragðaði undursamlegt te. Finn mig knúna til að mæla eindregið með Magic Moon laufunum frá Te & kaffi, og jafnframt því að öll mannannabörn eigi reglulega einn turbo-bounding session með besta vini sínum.

Svo uppnumin var ég eftir drykkjulætin í okkur Unni, að um leið og ég var komin suður í gærmorgun þá stímaði mín í Te & kaffi verslunina á Laugaveginum og keypti sér þessi himnesku telauf og síu. Laugardagurinn í bókabúð M&M var bara nokkuð viðburðaríkur og yðar einlæg hugsaði: 'Hví er ég yfirhöfuð að skreppa norður?'

Hitti:
Ragnheiði Diljá sem vann með mér sumarlangt á Dvalarheimilinu Hlíð
Möggu og Þórnýju
SÓ (sögukennarann minn gamla)
Hlyn, kollega úr Bókval
Gunna Árna (sem aldrei hefur kennt mér en er ávallt einkar kumpánalegur)
ömmu Helgu og afa Adda

sem komu svo í heimsókn um kvöldið. Þá voru heimsmálunum gerð góð skil - hvenær er líðandi stund liðin? Þegar gömlu hjúin voru horfin á braut hellti ég upp á töfratunglte og svalg tvær stórar skálar af veigunum meðan 'Once Up On a Time in Mexico' spilaði. Það reyndist nokkuð blóðug ræma og ekki alveg í takt við stemminguna, en hvað um það.

Á leiðinni í vinnuna í morgun gekk svo ég fram á dauðan kött og fór að skæla.